12:47, 15 Тамыз 2020 | GMT +6
Түркия мен Қазақстан 1 қыркүйектен бастап әуе қатынасын қалпына келтіреді
АНКАРА. АНАДОЛЫ – ҚазАқпарат – 1 қыркүйектен бастап Түркия мен Қазақстан арасындағы әуе қатынасы жаңартылады, деп хабарлайды ҚазАқпарат Анадолы агенттігіне сілтеме жасап.
Түркия елінің Көлік және инфрақұрылым министрі Әділ Қараисмаилоғлының айтуынша, Түркия мен Қазақстан арасындағы әуе қатынасы 1 қыркүйектен бастап жаңартылады.
Еске сала кетсек, 7 тамыз күні Анкарада Қазақстанның вице-премьері Ералы Тоғжанов бастаған қазақстандық делегация Түркия Денсаулық сақтау министрі Фахреттин Қожамен кездесу өткізіп, онда әуе қатынасын қалпына келтіру мәселелерін талқылады.
Бұған дейін, 6 тамызда түрік билігінің Air Astana компаниясына Түркияға екі апта ұшуға тыйым салғаны туралы хабарланған. Одан кейін Түркия Елшілігі Қазақстаннан әуе рейстерінің тоқтатылу себебін түсіндірді.