Ұлттық жоба – қоғамды мазалаған мәселеге мемлекеттің тікелей жауабы – сарапшы
«Мемлекеттік бағдарлама форматынан ұлттық жобаға ауысу өзекті мәселелерді шешу тәсіліндегі оң өзгеріс. Біздегі мемлекеттік бағдарламалар ұзақмерзімді және олар әкімшілік сипатта. Яғни 10 жылдық бағдарлама мәреге жетсе, жаңадан тағы 10-20 жылға арналған бағдарлама пайда болады. Осы орайда Ұлттық жобаның ерекшелігі мен артықшылығы ол – қысқамерзімді. Яғни қысқамерзімді ұлттық жобаның нәтижесіне баға бермей тұрып, оны ұзарту немесе қайта жандандырудың қажеті болмайды», - деді Ермек Тоқтаров.
Сондай-ақ, сарапшы Ұлттық жобаларда жұртшылықты жиі толғандыратын барлық сала қамтылғанын айтты.
«Елімізде қолға алынып жатқан барлық 10 Ұлттық жоба халықтың әл-ауқатын одан әрі жақсартуға бағытталған және онда адам үшін маңызды барлық сала қамтылған. Атап айтқанда, денсаулық сақтау, білім беру, экология, қауіпсіздік, сапалы өмір, мемлекеттік қызмет және тағы басқа. Ұлттық жоба – қоғамды мазалаған мәселе мен сауалға мемлекеттің тікелей жауабы. Ұлттық жобаларды қабылдау – мемлекеттік жоспарлау жүйесіндегі жаңашылдық. Оны жүзеге асыру үшін ұлттық жобалық және цифрлық кеңселер құрылды», - деді ол агенттік тілшісіне.
Еске салайық, Мемлекет басшысы Қасым-Жомарт Тоқаев өткен жылғы Қазақстан халқына Жолдауында мемлекеттік бағдарламалардан ұлттық жобаларға көшу туралы тапсырма берген еді.
13 қазан күні ҚР Президенті Ұлттық жобалар тізбесін бекіту туралы Жарлыққа қол қойды.
Премьер-Министр Асқар Мамин Ұлттық жобалардың не үшін әзірленгенін айтып берді.