Волонтерлер «АЛЖИР» музейіндегі реставрация жұмысына атсалысты
«Жас ұлан» бірыңғай балалар мен жасөспірімдер ұйымының баспасөз хатшысы Серік Бағланның айтуынша, мұндағы негізгі мақсат - мәдени-тарихи мұраны сақтау және дамыту, тарих, мәдениет ескерткіштері мен мемориалдық кешендерді қалпына келтіру.
«Алжир» музейі еліміздегі маңызды тарихи-мәдени орындардың бірі. Бұл жерде қаншама әжелеріміз, аналарымыз жазықсыз азапталып, көз жұмды. Осындай киелі жерді реставрациялау үшін «Birgemiz: Asyl Mura» жалпыұлттық жобасының 10 волонтері жұмылдырылды. Музей қызметкерлерінің нұсқауымен волонтерлер сол жердегі экспонаттардың шаңдарын сүртіп, тазалық жұмыстарын жүргізді. Бұл жұмыстар жастар арасында қол еңбегін насихаттауға көмектеседі деп ойлаймын», - дейді «Жас ұлан» бірыңғай балалар мен жасөспірімдер ұйымының төрайымы Динара Сәдуақасова.
«Birgemiz: Asyl Mura» жалпыұлттық жобасының маңызды бағыттарының бірі - волонтерлерді реставрациялық жұмыстарға жұмылдыру. Бұл волонтерлер жоба аясында оқытудан өткен болатын.
«Мен үшін реставрациялық жұмыстарға атсалысып, елімнің тарихи-мәдени мұраларын қалпына келтіруге үлес қосу үлкен мақтаныш. «Birgemiz: Asyl Mura» жалпыұлттық жобасы арқылы біз бұрын білмеген бірнеше тарихи-мәдени орындармен танысып қана қоймай, оларды қалпына келтіруге де үлесімізді қосып жатырмыз. «АЛЖИР» музейіндегі реставрациялық жұмыстарға қатысқаныма қуаныштымын. Жастарды осындай игі істерге шақырғым келеді», - дейді волонтер Мағжан Сағынтаев.
Алдағы уақытта реставрациялық жұмыстар аяқталғаннан кейін волонтерлер үшін музейге арнайы экскурсия жүргізілмекші.