13:27, 22 Маусым 2021 | GMT +6
Жәнібек Әлімханұлы әлемнің экс-чемпионымен айқас алдында коронавирусқа тест тапсырды
НҰР-СҰЛТАН. ҚазАқпарат – Қазақстандық боксшы Жәнібек Әлімханұлы (9-0, 5 КО) орта салмақтағы бұрынғы әлем чемпионы Роб Брантпен (26-2, 18 КО) жекпе-жек үшін Лас-Вегасқа ұшуға дайындық үстінде, деп хабарлайды ҚазАқпарат Sports.kz сайтына сілтеме жасап.
Жәнібек Әлімханұлы командасының инстаграм-аккаунтында боксшы және оның қасындағылардың сапар алдында коронавирусқа тест тапсырғаны хабарланды. Сәрсенбі күні олар Невадаға ұшуды жоспарлап отыр. Бейсенбі күні шоу қатысушыларының баспасөз мәслихаты өтпек. Жекпе-жек Нұр-Сұлтан уақытымен 27 маусым күні таңертең өтеді.
Еске сала кетейік, кештің басты айқасы екі салмақ дәрежесіндегі экс-чемпион, украиналық Василий Ломаченко мен жапондық өкіл Масаеши Накатани арасында болады.