10:37, 15 Қыркүйек 2020 | GMT +6
«ЖЭО-2» газға ауысса, Алматының ауасы 80 пайыз тазарады
АЛМАТЫ. ҚазАқпарат – «Алматы Жылуэлектр орталығының» табиғи газға өтуі ауаға таралатын зиянды заттардың мөлшерін 80 пайызға азайтады. Бұл туралы «Самұрық-Энерго» АҚ мәлім етті, деп хабарлайды ҚазАқпарат тілшісі.
«Самұрық-Энерго» АҚ хабарлауынша, оңтүстік астанадағы жылу мен электр энергиясының негізгі көзі - Алматы ЖЭО-2 толығымен газға көшеді.
Қазіргі таңда «АлЭС» АҚ тапсырысымен «ҚазЭнергоөнеркәсіптік» жобалау институтының мамандары ЖЭО– 2 модернизациялаудың жобасын әзірлеуде.
Кәсіпорынды газға ауыстыру ауаға бөлінген зиянды заттардың мөлшерін айтарлықтай азайтады. ЖЭО-2 шығатын шығарындылардың жылдық мөлшері 80% -ға төмендейді. Осылайша Алматының ауасы тазарады.
Қазіргі уақытта «Самұрық-Энерго» АҚ жобаны қаржыландырудың қолайлы көздері мен әдістерін тарту бойынша жұмысты жалғастыруда.