Жетісайда 3 жасар бүлдіршін түн жарымында жалғыз жүрген
Облыстық ПД баспасөз қызметінің айтуынша, Жетісай жедел-тергеу тобының қызметкерлері сағат 04:30 шамасында шақырту бойынша жолға шыққан.
Олар «Абай» саябағында шамамен 3-4 жастағы кішкентай баланың жалғыз жүргенін байқап қалады.
Тәртіп сақшылары ұл баладан қайда тұратынын сұрағанда, тілі толық шықпаған бүлдіршін нақты жауап бере алмаған.
Болмаған соң полицейлер одан ары баланың ата-анасын анықтап, үйін табу мақсатында ол табылған аумақтағы үйлерді жеке-жеке аралап шыққан.
Баланың фотосуретін көрсетіп, іздестіру іс-шараларын жүргізген. Нәтижесінде жоғалған баланы іздеп жүрген әйелді тапқан.
Ол бүлдіршіннің нағашы әпкесі болып шыққан. Тексеру кезінде анықталғандай, үй-іші толық ұйықтап жатқанда оянып кеткен бала үйінен шығып кеткен.
Таңертең анасы ұйқыдан тұрғанда қасында баласы болмағаннан кейін олар полицейлерге хабарламастан өздері іздей берген.