Жол бойында емін-еркін жайылатын мал иелеріне жауапкершілікті күшейту қажет - сарапшы
«Тағы бір көкейтесті мәселеге назарларыңызды аударғым келіп отыр. Ол – малды басып кету дерегі бойынша орын алатын жол-көлік оқиғалары. Бұндай жағдайлар көбіне иелерінің қараусыз қалдырылған үй жануарларының қатысуымен орын алады. Соңғы 5 жылда малды басып кеткен 643 оқиға тіркелген. Мұндай жағдайларда, жүргізушілер материалдық шығын шегіп қана қоймай, ауыр жарақаттанып, тіпті қаза болып жатады», - деді ол Орталық коммуникациялар қызметінде баспасөз мәслихаты барысында.
Орталық бас директорының мәліметінше, тек өткен жылдың өзінде республикалық трассаларда осындай 104 жол-көлік оқиғасы орын алып, 140 адам жарақаттанса, 36 адам қайтыс болған.
«Үй жануарларын жолдар бойында еркін жаюды болдырмау үшін меніңше, мал иелерінің жауапкершілігін қатайту қажет. Сондай-ақ үй жануарлары иелерін жауапкершілікке тарту мәселесін заңдық негізде нақты тетіктермен бекіту керек деп санаймын», - деді Замир Сағынов.