«Жұмыспен қамту» жол картасына бірқатар талап енгізу ұсынылды - Үкімет отырысы
«Президенттің тапсырмасы бойынша Жұмыспен қамтудың жол картасын 2021 жылы жалғастыру бойынша дайындық жұмыстары басталды. Осыған байланысты жол картасын тұрақты әрі жаңа жұмыс орындарын құруға бағыттап, оның тәсілдерін жетілдіру үшін келесі талаптарды ұсынамыз. Біріншіден, іске асырылатын жобалардың сапасын қамтамасыз ету мақсатында орталық деңгейде жобаларды іріктеу бойынша мемлекеттік органдардың өкілдері мен Парламент депутаттарының қатысуымен жұмыс тобын құру қажет. Екіншіден, қаржыландыру лимиттерін аймақтар бойынша жұмыссыздар мен өзін-өзі жұмыспен қамтығандар санына сәйкес анықтау керек. Сондай-ақ тұрақты жұмыс орындарын құратын жаңа нысандарды салуға және кәсіпкерлікке несие беруді белгілеген жөн», - деді Біржан Нұрымбетов Үкімет отырысында.
Министр сондай-ақ 2021 жылы жұмыспен қамту уақыты аз жөндеу жұмыстарын көздейтін жобаларды және республикалық меншік нысандары мен капиталды көп қажетсінетін жобаларды қарамауды ұсынды.
«Жұмыспен қамту тұрғысында бірлесе атқарып отырған шаруалардың нәтижелері халықтың табысының төмендемеуіне оң әсерін тигізер деп сенеміз», - деді ол.